काठमाडौँ । नेपाली कांग्रेसका नेता दिलेन्द्रप्रसाद बडूले पार्टी विभाजन हुन नदिन आफूहरू लागिपर्ने बताएका छन् । सोमबार बिहान नेता डा. शेखर कोइराला पक्षधरहरूको भेलापछि सञ्चारकर्मीहरूसँग कुरा गर्दै उनले यस्तो बताएका हुन् ।
उनले पार्टी विभाजन हुन लागेको र यसलाई कसरी जोगाउने भन्ने चिन्ता सबैमा रहेको बताए । महामन्त्री र संस्थापन पक्षधरहरूसँग छलफल गरेर आफूहरू अघि बढ्ने निर्णयमा पुगेको उनले जानकारी दिए । पार्टीमा हुनुपर्ने सुधार र पुस्तान्तरणबारे पनि आफूहरूले मुद्दा उठाउँदै आएको उनले सुनाए ।
अब पार्टीलाई सुरक्षित राख्न र विवादरहित ढंगले अघि बढ्नुपर्ने आवश्यकता रहेको बडूले औँल्याए । उनले सबैको चिन्ता पार्टी विभाजन नहोस् भन्ने रहेको भन्दै महामन्त्री र संस्थापन दुवै पक्षलाई विभाजनको बाटोमा नजान सुझाव दिएको बताए । पार्टीलाई विभाजनको जोखिमबाट बचाउन डा. कोइरालाले दुवै पक्षका नेताहरूसँग संवाद गर्ने तयारी गरेको उनले जानकारी दिए ।
