काठमाडौं । नेकपा एकीकृत समाजवादीका प्रचार विभाग उपप्रमुख दामोदर अर्यालले माओवादीसँग हुने एकता वाम एकता नभई अभियुक्त एकता हुने टिप्पणी गरेका छन् ।
माओवादीसँग एकताबारे पार्टीको जारी केन्द्रीय समिति बैठकमा छलफल चलिरहेको बेला उनी एकताको विपक्षमा उभिएका हुन् ।
‘माओवादी अध्यक्ष प्रचण्ड सम्पत्ति शुद्धीकरणको छानविनमा पर्नुभएको छ । उपाध्यक्ष पासाङ सुन तस्करीसम्बन्धी छानबिनमा हुनुहुन्छ । अर्का उपाध्यक्ष महरा सुन तस्करी आरोपमा जेलमा हुनुहुन्छ । प्रवक्ता अग्निजी ज्यान मुद्दामा तारेख खेपिरहनु भएको छ’ उनले भने, ‘त्यसकारण यतिखेर माओवादीसँग एकता गर्नु भनेको वाम एकता होइन, अभियुक्त एकता हुन्छ ।’
उनले अभियुक्त एकताको विरोध गरेर वास्तविक वाम एकताको पहल थाल्न पार्टी पङ्क्तिमा आग्रह गरेका छन् । अध्यक्ष माधव नेपालले आफू अनुकूल केन्द्रीय सदस्य थप गरेको प्रति अर्यालले असन्तुष्टि जनाए । ‘मनोनित गर्दै जानुहोस्, बहुमत सिद्ध गर्दै जानुहोस्, तर याद गर्नोस् कमरेड, तपाईंको कमिटीको बहुमतले समाजको बहुमत सिद्ध गर्दैन । समाजमा हामी निरन्तर अल्पमतमा पर्दै गइरहेका छौ ।’
