काठमाडौँ । काठमाडौँको स्वयम्भूबाट पक्राउ परेका चिनियाँ नागरिक ३८ वर्षीय जियाओ याङ्ग र धादिङको नीलकण्ठ नगरपालिका घर भएकी २२ वर्षीया रोजिना सुनारको साथबाट प्रहरीले थप ४० लाख बरामद गरेको छ ।
कात्तिक ६ प्रहरीले पक्राउ गरेर प्रहरीले त्यसदिन ६९ लाख ८५ हजार नगद बरामद गरेको थियो । अनुसन्धान गरेर प्रहरीले थप रकम फेला पारेको हो ।
आरोपीहरूको साथबाट कुल १ करोड १० लाख ७० हजार नगद बरामद गरिएको जिल्ला प्रहरी परिसर काठमाडौँका एसपी पवन भट्टराईले जानकारी दिए । स्वयम्भू सानो भर्याङस्थित सरिता महर्जनको घरमा उनीहरूको भाडामा लिएको कोठाबाट प्रहरीले सुनका गहनाहरूसमेत बरामद गरेको छ ।
नेकलेस २ थान, झुम्का २ थान, बाला ४ थान, औँठी ३ थान र शिरबन्दी १ थान बरामद गरिएको प्रहरीले जनाएको छ । आरोपीहरूको डेराबाट प्रहरीले आईफोन र म्याकबुक पनि बरामद गरेको छ ।
आरोपीहरु विरुद्ध हुन्डी सम्बन्धी कसुरमा ८ दिनको म्याद लिएर अनुसन्धान थालिएको एसपी भट्टराईले जानकारी दिए । उनीहरूबारे प्रहरी वृत्त स्वयम्भूले अनुसन्धान गरिरहेको छ ।
