काठमाडौं । मेलम्चीका मेयरको खण्डन यस प्रकार रहेको छ ।
समाचारको खण्डन
श्री सम्पादकज्यू,
नेपाली बागमती भ्वाइस अनलाइन ।
विषय ः समाचारकोे खण्डन गरिएको ।
प्रस्तुत विषयमा तपाईको अनलाइन समाचार माध्यम नेपाली बागमतीभ्वाइस डट कममा मेलम्ची नगरपालिकाको विषयमा प्रकाशित समाचार ‘मेलम्ची नगरपालिकामा मेयर उपमेयरको ताण्डव नृत्य, ऐन कानुन बिपरित करोडौ रकम आफू अनुकुल खर्च’ शीर्षकको समाचारमा हाम्रो गम्भीर ध्यानाकर्षण भएको छ । महालेखापरीक्षकको प्रतिवेदनलाई समाचार स्रोतको रुपमा उल्लेख गरेर प्रकाशन गरिएको समाचारको शीर्षक नै समाचारको मर्म बिपरीत चरित्र हत्या गरेर लेखिएको छ ।
महालेखा परीक्षकको कार्यालयले सार्वजनिक गरेको प्रतिवेदनमा केही खर्चहरु बेरुजु देखिएको भएपनि त्यसलाई नियमित गर्ने प्रकृया कार्यालयले सुरु गरिसकेको छ । प्रतिवेदन आउना साथ जनप्रतिनिधिको नाम मुछेर अनियमितता ग¥यो भन्नु लेखा परीक्षणको मर्म र भावना बिपरीत हो । कार्यालयले कुनै पनि निर्णय गर्दा ऐन कानुनको परिधिमा रहेर कार्यपालिका र नगरसभाको निर्णय अनुसार हुने गरेको छ । विद्यालय, सामाजिक संस्था र अन्य निकायलाई विनियोजन गरिएको रकम प्रकृया नपुगेका कारण बेरुजु देखिएको हो र यसलाई नियमित गर्ने प्रकृया हुन्छ । यसमा जनप्रतिनिधिको कुनै संलग्नता हुँदैन । तपाईंको समाचारमा उल्लेख गरिएको ठेक्का प्रकृयाको सम्बन्धमा सार्वजनिक खरिद ऐन अनुसार इ बिडको माध्यमबाट गरिने भएकाले यसमा कसैको संलग्नता हुने प्रश्नै उठ्दैन । नियम अनुसार टेन्डर आव्हान गरेपछि मान्यता प्राप्त निर्माण व्यवसायीले अनलाइन मार्फत टेन्डर हाल्ने र कानुनी प्रकृया पूरा गरेपछि मात्र खुल्ने भएकाले यसमा जनप्रतिनिधिको कुनै भूमिका नै हुँदैन ।
समाचार लेख्ने क्रममा पत्रकारिताको न्युनतम सिद्धान्त अनुरुप हामीलाई समाचारमा प्रतिक्रिया राख्ने अवसर समेत नदिई हाम्र चरित्र हत्या गर्ने प्रयास तपाई र तपाईकै समाचार कपि पेस्ट गर्ने अन्य अनलाइनले गरेका छन् । एउटै समाचार विभिन्न अनलाइनमा प्रकाशित हुनुले पनि जनप्रतिनिधि र समग्र नगरपालिकाको बदनाम गराउने नियत राखेको प्रस्ट हुन्छ ।
अतः तथ्यहिन र केबल आरोप लगाएर चरित्र हत्या गर्ने प्रयास मात्र गरिएको यस समाचारमा सत्यता नरहेकाले भ्रममा नपर्न सम्पूर्ण पाठक वर्गमा अनुरोध गर्दै समाचारको खण्डन गरिएको जानकारी गराउँदछौं ।
नगर प्रमुखको सचिवालय
मेलम्ची नगरपालिका
