काठमाडौँ । प्रमुख प्रतिपक्षी दल नेपाली कांग्रेसले प्रतिनिधिसभा अन्तर्गतको सार्वजनिक लेखा समितिको सभापतिमा उम्मेदवारी दिने तयारी गरेको छ । कांग्रेस सांसद भीष्मराज आङदाम्बेले लेखा समितिमा उम्मेदवारी दिने निश्चित भइसकेको जानकारी दिए ।
‘लेखा समितिमा उम्मेदवारी दिन्छौँ,’ आङदाम्बेले भने, ‘प्रमुख प्रतिपक्षी दलको सभापति हुने समिति हो । त्यसमा उम्मेदवारी दिन्छौँ । बाँकी समितिमा के गर्ने भन्ने विषयमा विपक्षी दलहरूसँग केही बेलामा छलफल हुँदैछ ।’
लेखा समितिमा भरत खड्का, मोहन आचार्य, योगेश गाैचन र जनकराज गिरीमध्ये एक जनालाई उम्मेदवार बनाइने आङदाम्बेले बताए । ‘चार जनाले इच्छा देखाउनु भएको छ । उहाँहरूमध्ये एक जनालाई उम्मेदवार बनाउँछौँ,’ आङ्दाम्बेले भने ।
सङ्घीय संसद् सचिवालयले दिउँसो १ बजेदेखि दिउँसो ४ बजेसम्म मनोनयन दर्ताको समय निर्धारण गरेको छ । मनोनयन दर्ता गर्ने स्थान सिंहदरबारस्थित प्रतिनिधिसभा सचिवको कार्यकक्ष निर्धारण गरिएको छ । दिउँसो साढे ४ बजे नै उम्मेदवारहरूको सूची प्रकाशन गर्ने समय निर्धारण गरिएको छ ।
प्रतिनिधिसभा अन्तर्गत १० वटा र दुई संयुक्त समिति सभापतिको निर्वाचन शुक्रबारका लागि तय गरिएको छ । गत चैत २७ गते प्रतिनिधि सभा बैठकमा विषयगत समितिमा रहने सदस्यहरूको नाम सभामुख डोलप्रसाद अर्यालले वाचन गरेका थिए । र शुक्रबारका लागि सभापतिको निर्वाचनको मिति तोकेका थिए ।
