काठमाडौं । नेकपा माओवादी केन्द्रका सांसद माधव सापकोटाले उपप्रधान तथा गृहमन्त्री रवि लामिछानेको विषयमा प्रधानमन्त्री प्रचण्डले सदनमा राज्य संयन्त्रले दिएको तथ्यका आधारमै जवाफ दिएको बताएका छन् ।
प्रतिनिधिसभाको बैठकमा बोल्दै प्रधानमन्त्रीको जवाफलाई विपक्ष दलले चित्त नबुझाउनु स्वाभाविक भएपनि व्यक्ति केन्द्रित भएर नलाग्न आग्रह गरे ।
उनले भने, ‘प्रधानमन्त्रीले सदनमा उठेको विषयमा जवाफ दिइसक्नुभएको छ । प्रतिपक्षले त्यो कुराको चित्त बुझेन भन्न पाइन्छ । तर, उत्तर दिन आएन भने प्रधानमन्त्री आएन भन्ने, आएर तथ्यअनुसार जवाफ दिँदा तपाईँहरूले प्रधानमन्त्रीले फैसला गर्नुभयो । प्रधानमन्त्रीले फैसला गर्नुभएको होइन । राज्यको संयन्त्रहरूले दिएको तथ्य प्रमाणका आधारमा संसदमा प्रस्तुत गर्नुभएको हो । तर, अमुक रूपमा कोही व्यक्ति विशेषलाई खुइल्याउने भन्दा पनि जिम्मेवार ढंगले अघि बढ्न आवश्यक छ ।’
उनले १५ महिनामा ३ वटा मात्रै कानूनहरु पारित भएकाले सदनमा सबैलाई जिम्मवार ढंगले अघि बढ्न आग्रह गरे ।
२८ चैत्र २०८०, बुधबार १३:०७ मा प्रकाशित
