काठमाडौँ । इरानसमर्थित यमनका हुथी विद्रोहीले साउदी अरबको राजधानी रियादसहित लालसागर तटीय क्षेत्रमा रहेका प्रमुख ऊर्जा केन्द्रहरूमा ड्रोन तथा ब्यालिस्टिक क्षेप्यास्त्र प्रहार गरेको दाबी गरेका छन्।
साउदी अधिकारीहरूले शनिबार रियादतर्फ प्रहार गरिएको एउटा ब्यालिस्टिक क्षेप्यास्त्रलाई हवाई प्रतिरक्षा प्रणालीमार्फत आकाशमै नष्ट गरिएको पुष्टि गरेका छन्। अन्य आक्रमणबारे आधिकारिक पुष्टि नभए पनि रियादस्थित अन्तर्राष्ट्रिय विमानस्थलनजिकै रहेको इन्धन भण्डारण ट्यांकीबाट कालो धुवाँको मुस्लो उठेको देखिएको थियो। घटनालगत्तै विमानस्थलका उडानहरू केही समय अवरुद्ध बनेका थिए।
रियादमा पहिलोपटक हवाई आक्रमणको चेतावनी
हुथी विद्रोहीले आक्रमण तीव्र पारेयता शनिबार पहिलोपटक राजधानी रियादमा हवाई आक्रमणको चेतावनी (अलार्म) जारी गरिएको थियो। साउदी नागरिक सुरक्षा निकायले नागरिकहरूको मोबाइल फोनमा सम्भावित खतराबारे सतर्कता सन्देश पठाएको थियो। उत्तरी रियादका बासिन्दाहरूले चेतावनीलगत्तै ठूलो विस्फोटको आवाज सुनेको बताएका छन् भने अरामकोको इन्धन ट्यांकीमा लागेको आगो नियन्त्रणमा लिन दमकलहरू खटिएका थिए।
अरामकोका ऊर्जा केन्द्रलाई निशाना बनाएको हुथीको दाबी
हुथी सैन्य प्रवक्ता याह्या अल-सारियाले रियादका संवेदनशील क्षेत्र तथा यान्बुस्थित साउदी सरकारी तेल कम्पनी ‘अरामको’लाई निशाना बनाइएको वक्तव्यमार्फत जनाएका छन्। साउदी अरबले यमनको राजधानी सानामाथि गरेको आक्रमणको जवाफमा ठूलो संख्यामा ब्यालिस्टिक, क्रुज क्षेप्यास्त्र र ड्रोन प्रयोग गरिएको उनको दाबी छ। यद्यपि क्षतिको स्वतन्त्र पुष्टि हुन सकेको छैन।
अमेरिकी नागरिकलाई यात्रा पुनर्विचार गर्न आग्रह
साउदी नेतृत्वको गठबन्धनले बिश, ताइफ, फरासान र यान्बु सहरमा नागरिक बस्ती लक्षित प्रयासहरू विफल पारिएको जनाएको छ। मध्यपूर्वमा बढ्दो तनावलाई मध्यनजर गर्दै अमेरिकी विदेश मन्त्रालयले आफ्ना नागरिकलाई मध्यपूर्व क्षेत्रमा यात्रा गर्ने योजनाबारे गम्भीरतापूर्वक पुनर्विचार गर्न आग्रह गरेको छ। मन्त्रालयले हुथी समूहले नागरिक विमानस्थलहरूलाई समेत लक्षित गरेकाले सैन्य द्वन्द्व थप फैलन सक्ने चेतावनी दिएको छ।
यमन गृहयुद्ध र लालसागरको सामुद्रिक मार्गमा संकट
यमनमा हुथी र साउदीसमर्थित सरकारी फौजबीच भएको पछिल्लो भिडन्तमा कम्तीमा ४८ जनाको मृत्यु भएको विवरण सार्वजनिक भएको छ। अन्तर्राष्ट्रिय आप्रवासन संगठन (आईओएम) का अनुसार पछिल्लो लडाइँका कारण विस्थापित हुनेको संख्या १ लाख ४ हजार नाघेको छ।
यसैबीच, हुथीहरूले लालसागरको रणनीतिक मोखा बन्दरगाह र पेरिम टापु नियन्त्रणमा लिएको दाबी गरेका छन्। अमेरिका-इजरायल र इरानबीचको द्वन्द्वका कारण ‘स्ट्रेट अफ होर्मुज’ प्रभावित भइरहेका बेला लालसागरको मार्गसमेत असुरक्षित बन्दा विश्व बजारमा तेलको मूल्य र आपूर्ति शृंखलामा थप अनिश्चितता सिर्जना भएको अन्तर्राष्ट्रिय वित्तीय विश्लेषकहरूले जनाएका छन्।
