काठमाडौं । अर्जेन्टिनाले विश्वकप सेमिफाइनलमा इङ्ल्यान्डलाई २–१ ले पराजित गरेपछि खेलाडीहरूले ‘लास माल्भिनास सोन अर्जेन्टिनास’ (फकल्याण्ड टापु अर्जेन्टिनाकै हो) लेखिएको ब्यानर प्रदर्शन गरेपछि बेलायतले फिफासँग त्यस घटनाको अनुसन्धान गर्न माग गरेको छ।
बेलायती प्रधानमन्त्री किअर स्टार्मरको कार्यालय डाउनिङ स्ट्रिटले व्यापारमन्त्री पिटर काइलको मागलाई समर्थन गरेको छ।
काइलले उक्त ब्यानर प्रदर्शनलाई फिफाका नियमको ‘गम्भीर उल्लङ्घन’ भएको बताएका छन्। फिफाका नियम अनुसार खेल मैदानमा राजनीतिक सन्देश वा प्रतीक प्रदर्शन गर्न निषेध छ।
डाउनिङ स्ट्रिटका प्रवक्ताले भने, ‘विश्वकप हाम्रो नहोला, तर फकल्याण्ड टापु निश्चित रूपमा हाम्रो हो।’
सन् १९८२ मा अर्जेन्टिनाले दक्षिण एटलान्टिकस्थित बेलायती विदेशी भूभाग फकल्याण्ड टापुमाथि आक्रमण गरेको थियो।
त्यसपछि तत्कालीन बेलायती प्रधानमन्त्री मार्गरेट थ्याचरले नौसैनिक बल परिचालन गरेपछि भएको छोटो युद्धमा बेलायतले पुनः टापुमाथि नियन्त्रण कायम गरेको थियो।
पिटर काइलले अमेरिकाको जर्जिया राज्यस्थित एटलान्टामा भएको सेमिफाइनलपछि फिफाले घटनाबारे गहिरो अनुसन्धान गर्नुपर्ने बताए।
उनले बीबीसीसँग कुरा गर्दै भने, ‘राजनीति र फुटबल अलग हुनुपर्छ। विश्वकपको आधारभूत सिद्धान्तमध्ये एक पनि यही हो कि राजनीति फुटबलबाट अलग रहनुपर्छ। अब यो विषय फिफाको जिम्मेवारी हो र हामी फिफाले यसबारे अनुसन्धान गर्ने अपेक्षा गर्छौं।’
यद्यपि, फिफाले यस घटनाबारे हालसम्म कुनै आधिकारिक प्रतिक्रिया दिएको छैन।
बेलायतले १९औँ शताब्दीदेखि फकल्याण्ड टापुमाथि नियन्त्रण राख्दै आएको छ। तर अर्जेन्टिनाले ती टापु आफ्नो भूभाग भएको दाबी गर्दै आएको छ।
यसैबीच, सेमिफाइनल अघि अर्जेन्टिनाकी उपराष्ट्रपति भिक्टोरिया भियारुएलले इंग्लिसहरुलाई ‘जबरजस्ती कब्जा गर्ने समुद्री डाकु’ भन्दै विवाद थप चर्काएकी थिइन्।
सन् १९८२ को फकल्याण्ड युद्धमा ६४९ अर्जेन्टिनी र २५५ बेलायती सैनिकको ज्यान गएको थियो।
उता, विश्वकप सेमिफाइनलमा जित हासिल गरेलगत्तै अर्जेन्टिनाका विदेशमन्त्री पाब्लो क्विर्नोले फकल्याण्ड टापुनजिक बेलायती युद्धपोत एचएमएस मेडवेको गतिविधिविरुद्ध बेलायतसमक्ष औपचारिक कूटनीतिक विरोधपत्र दर्ता गरिएको बताएका छन्।
उनले सामाजिक सञ्जाल एक्समार्फत एचएमएस मेडवेले पर्याप्त जानकारी नदिई अर्जेन्टिनाको दाबी गरिएको समुद्री क्षेत्रमा प्रवेश गरेको आरोप लगाउँदै त्यसप्रति कडा आपत्ति जनाएका छन्।
क्विर्नोका अनुसार सोमबार मितिको विरोधपत्र ब्युनस आयर्सस्थित बेलायती दूतावासमा बुझाइएको छ।
अर्जेन्टिनाले विश्वकप सेमिफाइनलमा इङ्ल्यान्डलाई २–१ ले पराजित गरेपछि खेलाडीहरुले यसबारे बेलायतले
