काठमाडौँ । पूर्वप्रधानमन्त्री डा.बाबुराम भट्टराईले पठाओ चालक गणेश नेपालीको मृत्युप्रति दुःख व्यक्त गरेका छन् । सामाजिक सञ्जाल फेसबुकमा भट्टराईले नेपालीको मृत्युवरण मात्र नभई पचासौँ लाख युवालाई बेरोजगार बनाउने देशको गम्भीर अर्थ राजनीतिक सङ्कट भएको लेखेका छन् ।
‘मुगुका २५ वर्षीय युवा गणेश नेपालीको राजधानी काठमाडौँमा राहदानी विभाग अगाडि आत्मदाह प्रयासको क्रममा जलेर निधन हुनु अत्यन्त दुःखद र गम्भीर घटना हो’, उनले लेखेका छन्, ‘यसले एकजना होनहार युवाको अकालमा दुःखद मृत्युवरण मात्र हैन पचासौँ लाख युवालाई बेरोजगार बनाउने देशको गम्भीर अर्थ राजनीतिक सङ्कट र त्यसको दिगो समाधान सट्टा ज्वालामुखीलाई स्याउलाले छोपेर टार्न खोज्ने राज्य संरचनाको लज्जास्पद चरित्रलाई उजागर गर्छ ! सबै गम्भीर बनौँ !’
