काठमाडौँ । चितवनस्थित बीपी कोइराला मेमोरियल क्यान्सर अस्पतालको रिक्त अध्यक्ष पदका लागि ३ जनाको नाम सिफारिस भएको छ । स्वास्थ्य तथा खाद्य स्वच्छता मन्त्री स्रोतका अनुसार डा.अजयकुमार झा, डा.योगेन्द्रप्रसाद सिंह र डा.विजय चन्द्र आचार्यको नाम सिफारिस भएको हो ।
‘३ जनाको नाम सिफारिस भएको पक्का हो । अझै फाइनल भएको छैन । फाइनल भएपछि भनौँला’ स्वास्थ्य मन्त्री निकट स्रोतले भन्यो । मन्त्रालयले भने सिफारिसमा परेका तीन जनाको नाम सार्वजनिक गरेको छैन ।
स्वास्थ्य मन्त्रालयले गत वैशाख १५ गते वीपी कोइराला मेमोरियल क्यान्सर अस्पतालको रिक्त अध्यक्ष पदमा नियुक्तिका लागि दरखास्त आह्वान गरेको थियो । मन्त्रालयले वैशाख १५ गते सूचना प्रकाशित गर्दै अस्पताल ऐन, २०५३ को दफा ७ को उपदफा (१) को खण्ड (क) बमोजिम योग्य उम्मेदवारबाट आवेदन मागेको हो ।
यसै अनुरूप स्वास्थ्य मन्त्रालयले गत जेठ २७ गते सात जना प्रारम्भिक सूचीको नाम सार्वजनिक गरेको थियो । प्रारम्भिक सूचिमा डा. अजयकुमार झा, डा. जया श्रेष्ठ, डा.भावना वाग्ले, डा.योगेन्द्र प्रसाद सिंह, डा.लक्ष्मी नारायण सिंह, डा.विजयचन्द्र आचार्य र डा.विश्वराम पौडेल परेका थिए ।
