काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले बोलाएको सर्बदलीय बैठक शुरु भएको छ ।
सभापति लामिछानेले समसामयिक राजनीतिक विषयमा छलफल गर्न भन्दै संसदमा प्रतिननिधित्व गर्ने दलहरुलाई बैठकमा बोलाएका हुन् । बैठक सिंहदरबारस्थित सङ्घीय संसद् सचिवालयअन्तर्गत सार्वजनिक लेखासमितिको हलमा केहीबेर अघि शुरु भएको छ ।
बैठकमा प्रतिनिधिसभा र राष्ट्रियसभामा प्रतिनिधित्व गर्ने राजनीतिक दलका सभापतिसहित दुई जनालाई बोलाइएको भएपनि दलका सभापतिहरु भने उपस्थित भएका छैनन् ।
कांग्रेस, एमाले र नेकपाले प्रतिनिधि पठाएका छन् भने राप्रपाका अध्यक्ष राजेन्द्र लिङ्देन सहभागी भएका छन् । त्यस्तै हर्क साम्पाङ नेतृत्वको श्रम संस्कृति पार्टीले बैठक बहिष्कार गरेको छ ।
कांग्रेसबाट संसदीय दलका नेता भिष्मराज आङदेम्बे सहभागी छन् भने एमालेबाट प्रमुख सचेतक ऐन महर र नेकपाबाट सहसंयोजक माधव नेपाल र बर्षामान पुन सहभागी छन् ।
