काठमाडौं । नेपाल अस्थायी शिक्षक तथा कर्मचारी महासंघले रिक्त रहेका राहत तथा अस्थायी कोटाहरुलाई दरबन्दीमा रुपान्तरण गरी खुला प्रक्रियाबाट पदपूर्ति गर्न माग गरेको छ ।
आइतबार काठमाडौंमा पत्रकार सम्मेलन गर्दै महासंघले अनुभवका आधारमा विद्यमान जनशक्तिको व्यवस्थापन गर्नुपर्ने र रिक्त रहेका राहत तथा अस्थायी कोटालाई दरबन्दीमा रुपान्तरण गरी खुला प्रक्रियाबाट पदपूर्ति गर्न माग गरेको हो ।
त्यस्तै अस्थायी प्रकृतिका शिक्षक कर्मचारीलाई योगदानमा आधारित सामाजिक सुरक्षा कोषमा आवद्ध गर्नुपर्ने, आगामी शिक्षा ऐनमार्फत विद्यमान समस्याहरु समाधान गर्नुपर्ने लगायतमा उनीहरूको माग छ । संयोजक विष्णु खत्रीले आफ्ना मागका बारेमा पहिलो चरणमा सरकारलाई ध्यानाकर्षण गराउने र त्यसपछि संघर्षका कार्यक्रम अघि बढाउने बताए ।
लामो समयदेखि विभिन्न माग राखेर आन्दोलन गर्दै आएको तर सरकारले सम्बोधन नगरेको उनको गुनासो छ । नेपाल शिक्षक महासंघले अस्थायी तथा राहत शिक्षक कर्मचारीलाई बेवास्ता गरेसँगै आफूहरू छुट्टै महासंघ बनाउन बाध्य भएको खत्रीको प्रष्टीकरण छ ।
त्यस्तै नेपाल राहत शिक्षक राष्ट्रिय समितिका संरक्षक खेमराज अधिकारीले वर्षौंदेखि राज्य तथा स्वयम शिक्षक महासंघबाटै अस्थायी शिक्षकहरू अपहेलित भएकाले अस्थायी प्रकृतिका शिक्षक कर्मचारिको छुट्टै महासंघ गठन गर्नुपरेको बताए ।
महासंघले दलगत गतिविधिमा पूर्ण असंलग्नता, ट्रेड युनियन अधिकारको रक्षा,गोल्डेन हेण्डसेकको व्यवस्था लगायतका १५ बुँदे घोषणापत्र समेत जारी गरेको छ ।
