काठमाडौं । नेपाल प्रहरीले सक्कली सुकुम्वासीहरुलाई आफ्नो हक मिच्ने नक्कली सुकुम्वासी र भूमिहीन व्यक्तिहरुको पहिचान गर्न आग्रह गरेकाे छ ।
प्रहरीले आज एक सूचना जारी गर्दै वास्तविक सुकुम्वासी र भूमिहीनहरु एकजुट भएर राज्यले गर्न लागेको व्यवस्थापन कार्यमा सहयोग तथा सहकार्य गरी सुरक्षा निकायलाई समयमै सही सूचना दिन भनेकाे हाे ।
प्रहरीले वास्तविक सुकुम्वासी तथा भूमिहीन नागरिकलाई आफ्नो हक अधिकारप्रति सजग रहन आग्रह गरेको छ। सरकारले सुरु गरेको सुकुम्वासी र भूमिहीन व्यवस्थापन प्रक्रिया वास्तविक पीडितको उज्ज्वल भविष्य, सुरक्षित बसोबास तथा सम्मानजनक जीवनयापन सुनिश्चित गर्नका लागि महत्वपूर्ण पहल भएको प्रहरीले जनाएको छ।
यसको मुख्य उद्देश्य वास्तविक सुकुम्वासी र भूमिहीनको पहिचान गरी उनीहरुलाई न्यायोचित आवास तथा आवश्यक अधिकार प्रदान गर्न रहेको प्रहरीको भनाइ छ । तर केही स्वार्थी तथा प्रभावशाली व्यक्तिहरुले वास्तविक पीडितको नाम र अधिकारको दुरुपयोग गर्दै अनुचित लाभ लिन खोजिरहेको पाइएको प्रहरीको आरोप छ ।
यस्ता गतिविधिका कारण वास्तविक सुकुम्वासी तथा भूमिहीन नागरिक अवसरबाट वञ्चित हुनुका साथै राज्यबाट प्राप्त हुने सेवा–सुविधाबाट समेत टाढा रहनुपर्ने अवस्था सिर्जना भइरहेको प्रहरीले उल्लेख गरेको छ। यसले समस्या समाधान हुनुको सट्टा झन् जटिल बन्दै गएको प्रहरीको ठम्याइ छ ।
सूचनामा भनिएको छ,‘यसको मुख्य उद्देश्य वास्तविक सुकुम्वासीर भूमिहीनहरू पहिचान गरी न्यायोचित आवास तथा अधिकार प्रदान गर्नु रहेको छ । तर, दुःख लाग्दो कुरा, केही स्वार्थी तथा टाठाबाठा व्यक्तिहरुले तपाइँहरुको नाम र हक(अधिकारको दुरुपयोग गर्दै अनुचित लाभ लिने प्रयास गरिरहेका छन्, जसको बारेमा तपाइहरु स्वयम् जानकार हुनुहुन्छ । त्यस्ता व्यक्तिहरुको कारण वास्तविक सुकुम्वासीर भूमिहीनहरु अवसरबाट वञ्चित हुने तथा राज्यबाट प्राप्त हुने सेवासुविधाबाट समेत टाढा रहनुपर्ने अवस्था सिर्जना भइरहेको छ । जसले गर्दा वास्तविक सुकुम्वासी र भूमिहीनहरु सधैँ अन्यायमा परिरहनु भएको छ र यो समस्या जहिले पनि ज्यूँका त्यूँ रहि आएको छ ।’
सुकुम्वासीसँग सहयोग माग्दै प्रहरीले भनेको छ,‘एउटा सानो सहयोगले मात्र वास्तविक पीडितको न्याय, अधिकार र सुरक्षित आवास सहितको भविष्य सुनिश्चित हुनेछ ।’
