काठमाडाैँ । गत भदौ २३ र २४ गतेको जेनजी आन्दोलनका क्रममा भएको घटनाको सत्यतथ्य पत्ता लगाउन गठित जाँचबुझ आयोगले तत्कालीन प्रधानमन्त्री एवं एमाले अध्यक्ष केपी शर्मा ओलीलाई बयानका लागि पत्र काट्ने तयारी गरेको छ ।
बिहीबार सिंहदरबारमा प्रधानमन्त्री सुशीला कार्कीसँगको छलफलपछि सञ्चारकर्मीहरुसँग कुरा गर्दै आयोगका अध्यक्ष गौरीबहादुर कार्कीले यस्तो पत्र काट्ने तयारी गरिएकाे बताएका हुन् ।
उनले प्रधानमन्त्री कार्कीले काम कहाँसम्म पुग्यो भन्नेबारे जिज्ञासा राखेको र आफूले जानकारी गराएको बताए । उनले एक महिना समय थप भएको र सोही समयभित्र प्रतिवेदन सरकारलाई बुझाउने तयारीमा आफू रहेको पनि बताए ।
सञ्चारकर्मीले अध्यक्ष कार्कीलाई ओली बयानका लागि नआएका के हुन्छ भन्दै प्रश्न गरेका थिए । साेकाे जवाफ दिँदै कार्कीले भने,‘ओलीजीलाई बोलाउने क्रममा छौँ । आउनुभएन भने भोलिको कुरा भोलि नै हुन्छ । उहाँलाई हामी चिठी काट्दैछौँ ।’
अध्यक्ष कार्कीले अध्यक्ष ओली बयानका लागि नआए त्यहीबेलामा थप निर्णय हुने पनि बताए ।
