20, Jun, 2024

अमेरिकी जहाज निर्माण अनुसन्धान ‘झुटो आरोपले भरिएको छ’ : चीन

बागमती भ्वाइस
बागमती भ्वाइस
६ बैशाख २०८१, बिहीबार ०८:२० | २ महिना अगाडी

एजेन्सी । बेइजिङले जहाज निर्माण, सामुद्रिक तथा रसद क्षेत्रमा चीनको व्यापार अभ्यासमाथि अमेरिकी अनुसन्धानको कडा विरोध गरेको बुधबार बताएको छ । उसले अमेरिकी अनुसन्धान ‘झुटो आरोपले भरिएको’ आरोप लगाएको छ ।

अमेरिकी ट्रेड रिप्रेजेन्टेटिभ (युएसटिआर) ले पाँच युनियनको हालैको निवेदनको जवाफमा अनुसन्धान सुरु गरेको घोषणा गरेको थियो । चीनको वाणिज्य मन्त्रालयले घोषणाको जवाफ दिँदै भनेको छ, “अनुसन्धान झुटा आरोपहरूले भरिएको छ, यसमा सामान्य व्यापार र लगाानी गतिविधिलाई अमेरिकी राष्ट्रिय सुरक्षा तथा कर्पोरेट हितलाई नोक्सान पुर्याउने भनेर गलत व्याख्या गरिएको छ र आफ्नो औद्योगिक समस्याका लागि चीनलाई दोष दिइएको छ ।”

मन्त्रालयले एक विज्ञप्तिमा भनेको छ, “चीन यसबाट पूरै असन्तुष्ट र यसको कडा विरोध गर्दछ ।” अमेरिकी राष्ट्रपति जो बाइडेनले ‘अनुचित प्रतिस्पर्धा’ लाई उद्धृत गर्दै व्यापार ऐनको धारा ३०१ अन्तर्गत हाल विद्यमान चिनियाँ स्टिल तथा आलुमिनियममा तीन गुणा कर बढाउन आग्रह गरेका छन् । कथित धारा ३०१ अनुसन्धान ट्रम्प प्रशासनद्वारा चीनसँगको व्यापार युद्धमा करको औचित्य प्रमाणित गर्नका लागि प्रयोग गरिएको प्राथमिक उपकरण थियो ।

“अमेरिकाले आफ्नै उद्योगहरूलाई खर्बौं डलर भेदभावपूर्ण तरिकाले अनुदान प्रदान गर्दछ तर चीनमाथि कथितरूपमा ‘गैर–बजार अभ्यास’ अपनाएको आरोप लगाउँछ”, बेइजिङको वाणिज्य मन्त्रालयले भनेको छ, “वास्तवमा चीनको उद्योगहरूको विकास उद्यमहरूको प्राविधिक आविष्कार र बजार प्रतिस्पर्धामा सक्रिय सहभागिताको परिणाम हो, अमेरिकी आरोपसँग टिक्ने कुनै आधार छैन ।”

“चीनले अनुसन्धानको प्रगतिमाथि सम्पूर्ण ध्यान दिनेछ र आफ्नो अधिकार तथा हितहरूको दृढतापूर्वक रक्षाका लागि सबै आवश्यक उपाय गर्नेछ”, विज्ञप्तिमा भनिएको छ ।

६ बैशाख २०८१, बिहीबार ०८:२० मा प्रकाशित

Discover more from Bagmati Voice

Subscribe now to keep reading and get access to the full archive.

Continue reading