12, Apr, 2024

अधिवेशनको मिति नजिकिएसँगै एमालेले सिन्धुलीको ५ नेताले दाबी

बागमती भ्वाइस
बागमती भ्वाइस
२१ चैत्र २०८०, बुधबार १५:३८ | १ हफ्ता अगाडी

सिन्धुली । नेकपा एमाले सिन्धुलीको नवौं जिल्ला अधिवेशन चैत २८ देखि हुँदैछ । अधिवेशनको मिति नजिकिएसँगै अध्यक्षमा पाँच नेताले दाबी गरेका छन् ।

हाल जिल्ला अध्यक्ष रहेका कुमारबहादुर कार्की (रामकुमार)सहित वर्तमान सचिव नारायण बराल, नेताहरु खड्ग खत्री, महेन्द्रदेव श्रेष्ठ र डम्बर कार्कीले नेतृत्वमा दावी गरेका छन्। जिल्लाको कमलामाई नगरपालिकाका अध्यक्षसमेत रहेका महेन्द्र र पूर्वप्रदेश कमिटी सदस्य डम्बरले त अध्यक्षमा आफूलाई मतसमेत माग्न थालिसकेका छन् । महेन्द्रले पार्टीमा पुस्तान्तरण र युवा नेतृत्व अपरिहार्य रहेको मुद्दासहित मत मागिरहेका छन् ।

डम्बरले पार्टीलाई विधि, पद्धति र लेनिनवादी संगठनात्मक पद्धतिअनुसार दण्ड र पुरस्कारलाई संस्थागत गरेर अगाडि बढ्नुपर्ने भन्दै नेतृत्वको लागि नेता कार्यकर्ताबीच छलफल चलाइरहेका छन् । यसैगरी अनेरास्ववियुको राजनीतिबाट आएका वर्तमान पार्टी सचिव नारायण अघिल्लो कार्यकालका सर्वसम्मत सचिव भएकाले पनि अहिले अध्यक्ष पदमा आफ्नो दाबी रहेको बताउँछन् । सकेसम्म अध्यक्ष बन्न प्रयत्न गर्ने र नभए सचिवमै दोहोरिने उनी निकटहरु बताउँछन् । पार्टीको सर्वसम्मत नेतृत्व चयनमा जोड दिनुपर्ने भन्दै केही नेताहरु आफ्नो पक्षमा सर्वसम्मत हुने आफ्ना निकटवर्तीहरुमार्फत बाहिर ल्याइरहेका छन् । यस्तो अवस्थामा अध्यक्ष हुन कमलामाई नगरपालिकाका निवर्तमान मेयर खड्ग खत्री पनि सक्रिय देखिन्छन् ।

वर्तमान अध्यक्ष कुमार पछिल्लो कार्यकाल पूरा नभएकाले पनि पुनः अध्यक्षमा आफ्नो दाबी रहेको बताउँछन् । ‘मैले युवा, बुढापाका सबै नेता कमरेडहरूसँग काम गरेको छु‘, उनले भने, ‘सबैलाई मिलाएर जाने, पार्टी संगठनलाई मजबुत बनाउन म सक्षम छु ।’ कुमार गएको सातौं अधिवेशनमा आफ्नै ज्वाइँ प्रदीप कटुवाललाई चुनावी प्रतिस्पर्धामा पराजित गरेर अध्यक्ष निर्वाचित भएका थिए।उनै कुमारलाई यस पटक भने ज्वाइँ प्रदीपकै साथ रहने बताइएको छ । सर्वसम्मत नभइ निर्वाचन हुने अवस्था आएमा कुमार र डम्बरमध्ये एकसँग महेन्द्रको चुनावी प्रतिस्पर्धा हुने सिन्धुली एमाले वृत्तमा चर्चा छ ।

अहिलेसम्म सचिवमा अनेमसंघ सिन्धुलीकी अध्यक्ष पार्वती भट्टराई, कार्यालय सचिव नवराज थिङ, दीपेश बराल, वेदराज दाहाल र तारानिधि पोखरेल आकांक्षी देखिएका छन् । उपसचिवमा दर्जन बढी आकांक्षी छन्।

चैत २८ र २९ गते हुने जिल्ला अधिवेशनमा आयोजक १२७ सहित करिब ७४० प्रतिनिधि सहभागी हुने प्रचार उपसमिति संयोजक सञ्जयकुमार दाहालले जानकारी दिए । उनका अनुसार ४७७ भूगोल, ९९ सल्लाहकार परिषद् तथा जनवर्गीय संगठनबाट प्रतिनिधि छनोट भइसकेका छन् । पाँच प्रतिशत मनोनीत गरिनेछ ।

२१ चैत्र २०८०, बुधबार १५:३८ मा प्रकाशित

Discover more from Bagmati Voice

Subscribe now to keep reading and get access to the full archive.

Continue reading