काठमाडौँ । अमेरिकाले शनिबार खार्ग टापुनजिकै इरानी तेल बोकेको ट्यांकरलाई लक्षित गरी चार वटा मिसाइल प्रहार गरेको इरानी सञ्चारमाध्यमले जनाएका छन् । आक्रमणपछि ठूलो विस्फोटको आवाज सुनिएको बताइएको छ ।
यसैबीच, अमेरिकी राष्ट्रपति डोनाल्ड ट्रम्पले इरानको भूमिगत आणविक केन्द्र ‘पिकैक्स माउन्टेन’मा गतिविधि देखिए तत्काल ठूलो आक्रमण गर्न सकिने चेतावनी दिएका छन् । उनले इरानविरुद्धको अमेरिकी सैन्य अभियानको मुख्य उद्देश्य इरानलाई आणविक हतियार बनाउनबाट रोक्नु रहेको बताएका छन् ।
खार्ग टापु होर्मुज जलडमरूमध्य नजिकै रहेको र त्यहाँबाट इरानको ठूलो हिस्सा तेल निर्यात हुने भएकाले यस क्षेत्रमा बढ्दो तनावले विश्व बजारमा तेल आपूर्तिमा असर पर्न सक्ने चिन्ता बढेको छ । होर्मुज जलडमरूमध्यबाट विश्वको करिब २० प्रतिशत तेल ओसारपसार हुने गरेको छ ।
इरानले भने अमेरिकी आक्रमणको कडा विरोध गर्दै आफ्नो सार्वभौमिकता उल्लङ्घन गरेको आरोप लगाएको छ । इरानले अमेरिकी सैन्य संरचनालाई लक्षित गरी जवाफी कारबाही गरेको जनाएको छ । अमेरिकाले भने आफ्ना आक्रमण नागरिकलाई लक्षित नगरेको दाबी गरेको छ ।
