काठमाडौं । अन्तर्राष्ट्रिय सम्बन्धका शोधकर्ता मोहसेन फरखानीका अनुसार अमेरिकाले इरानविरुद्ध लगाउने नयाँ प्रतिबन्धहरूमा चीन र रुस सहभागी हुने सम्भावना छैन।
अलजजिरासँग कुरा गर्दै उनले अमेरिकाले आफ्ना साझेदारहरूलाई साथमा लिएर दबाब बढाउन खोजे पनि चीनका लागि इरान प्रमुख तेल आपूर्तिकर्ता र महत्वपूर्ण आर्थिक साझेदार भएकाले चीनले यी प्रतिबन्धहरूलाई समर्थन नगर्ने स्पष्ट पारे।
प्रतिबन्धका बावजुद विश्व व्यापारका संवेदनशील जलमार्गहरू—विशेष गरी हर्मुज जलडमरूमध्य र बाब अल-मन्देब क्षेत्रमा इरानको बलियो रणनीतिक पकड कायमै छ। साथै, आफ्ना सहयोगीहरूलाई भरपर्दो सुरक्षा दिन नसकेको भन्दै पछिल्लो समय अमेरिकाको सुरक्षा प्रतिबद्धतामाथि क्षेत्रीय मुलुकहरूको विश्वास समेत घट्दै गएको छ।
यसरी चीन र रुसजस्ता प्रमुख शक्तिहरूको असहयोग तथा क्षेत्रीय समीकरणमा आएको बदलावका कारण अमेरिकी प्रतिबन्धहरू केवल एकपक्षीय निर्णयमा मात्र सीमित भई निष्प्रभावी बन्ने देखिन्छ।
