काठमाडौं । नुवाकोटको शिवपुरी गाउँपालिका–७ स्थित थानाभञ्ज्याङमा रोकिराखेको बस अनियन्त्रित भई गुड्दा भएको दुर्घटनामा पाँच जना घाइते भएका छन्।
जिल्ला प्रहरी कार्यालय नुवाकोटका अनुसार टोखा–छहरे सडकखण्ड अन्तर्गत काठमाडौंबाट दुप्चेश्वरतर्फ जाँदै गरेको बा.प्र. ०८–१ ख ००५२ नम्बरको बस यात्रुहरू खाजा खान ओर्लिएको समयमा सडक छेउबाट आफैं अघि बढेको थियो। गुड्दै गएको उक्त बसले नजिकै रोकिराखेको बा.प्र. ०३–००१ ज ११७६ नम्बरको खाली इभी भ्यानलाई ठक्कर दिएको थियो। ठक्करपछि दुवै सवारी सडकबाट करिब ३० देखि ४० मिटर तल भिरमा खसेका हुन्।
घाइतेहरूको अवस्था र विवरण
दुर्घटनामा बसमा सवार ५ जना महिला घाइते भएका छन्, जसमध्ये २ जनाको अवस्था गम्भीर रहेको छ:
गम्भीर घाइते:
कृष्णमाया प्रजापति (५४ वर्ष) – बनेपा नगरपालिका–८, काभ्रेपलाञ्चोक
उदयमाया खत्री (६५ वर्ष) – खाँडादेवी गाउँपालिका–२, रामेछाप
मध्यम घाइते:
सुजाता पोखरेल (२५ वर्ष) – लालबन्दी–९, सर्लाही (हाल: काँडाघारी, काठमाडौं)
शर्मिला श्रेष्ठ (४२ वर्ष) – बनेपा–१०, काभ्रेपलाञ्चोक
जानु श्रेष्ठ (६० वर्ष) – मैलुङ–६, दोलखा (हाल: काँडाघारी, काठमाडौं)
उद्धार तथा अनुसन्धान
दुर्घटनालगत्तै स्थानीय बासिन्दा र प्रहरीको संयुक्त टोलीले घाइतेहरूको उद्धार गरी उपचारका लागि काठमाडौंस्थित ग्रिनसिटी अस्पताल पठाएको छ। प्रहरीले बस चालकलाई नियन्त्रणमा लिएको छ भने घटनाको सम्बन्धमा थप अनुसन्धान भइरहेको जिल्ला प्रहरी कार्यालय नुवाकोटले जनाएको छ।
