काठमाडौँ । पूर्वप्रधानमन्त्री एवं नेकपा (एमाले) का अध्यक्ष केपी शर्मा ओलीले २०५८ जेठ १९ गते राजा वीरेन्द्र शाहको वंशनाश हुने गरी भएको नारायणहिटी दरबार हत्याकाण्ड तत्कालीन युवराज दीपेन्द्र शाहले नगरेको जिकिर गरेका छन् ।
ललितपुरको च्यासलस्थित पार्टी कार्यालयमा आयोजित एक कार्यक्रममा बोल्दै उनले यस्तो दाबी गरेका हुन् ।
आफ्ना आमाबुबा र भाइबहिनीसहित सबै परिवार नै सखाप बनाउने गरी दीपेन्द्रले दरबार हत्याकाण्ड मच्चाएर पछि आफैँलाई गोली हानी आत्महत्या गरेको भनी विश्वव्यापी रूपमा फैलाइएको हल्लामा कुनै सत्यता नरहेको ओलीको भनाइ छ । उनले दरबार हत्याकाण्डलाई दीपेन्द्रको प्रेम सम्बन्धसँग जोडेर एउटा ‘रेडिमेड’ कथा विश्वव्यापी रूपमा फैलाइएको बताए ।
दरबार हत्याकाण्ड कसले गर्यो भन्ने सत्य कुरा अझै खुल्न नसकेको उल्लेख गर्दै अध्यक्ष ओलीले भने, ‘२०५८ साल जेठ १९ गते दरबार हत्याकाण्ड भयो । दरबार हत्याकाण्ड हुनेबित्तिकै विश्वव्यापी रूपमा एउटा हल्ला फैलियो, फलानो फलानोको लभ थियो, त्यो लभमा यस्तो भएको थियो ।’
उनले अगाडि थपे, ‘एउटा यस्तो रेडिमेड स्टोरी र युवराज दीपेन्द्रले बाबु, आमा, भाई, बहिनी, काका, काकीसहित वंशनाश गरेर आफूले पनि आत्महत्या गरे भन्ने रेडिमेड कथा विश्वव्यापी रूपमा पुर्याइयो । बीसौँ वर्ष त्यस गलत सूचनाले राज गर्यो । सही सूचना के हो अझै थाहा छैन ।’
बिना अध्ययन तयार पारिएको उक्त कथाको रचनाकार को हो भन्ने कुरा अहिलेसम्म कसैलाई थाहा नभएको ओलीले बताए । उनले भने, ‘त्यो कथाको मूल वाचक को हो ? त्यो पनि थाहा छैन । तर एउटा कथा रचना भयो र वाचन गरियो । त्यो एकैचोटि विश्वव्यापी रूपमा फैलियो ।’
विश्वका प्रमुख सञ्चारमाध्यमहरूले समेत यति ठूलो घटनाका विषयमा सत्यतथ्य बुझ्ने चासो नराखेको भन्दै उनले अचम्म व्यक्त गरे ।
उनले थपे, ‘विश्वका प्रमुख सञ्चार माध्यमहरूले त्यत्रो विशाल घटनाको सन्दर्भमा किञ्चित बुझ्नुपर्ने, चासो राख्नुपर्ने कुरा केही ठानेनन् । बरु त्यही अफवाह बोकेर हिँड्न किन आवश्यक ठाने, त्यो पनि अनौठो कुरा छ । वास्तवमा त्यो सूचना सही होइन ।’
अध्यक्ष ओलीले दरबार हत्याकाण्ड दीपेन्द्रको प्रेम असफल भएका कारण भएको भन्ने कथा यस षड्यन्त्रमा संलग्नहरूले नै बनाएको टिप्पणी गरेका छन् ।
