काठमाडौं । सह-आयोजक मेक्सिको ग्वाडालजारामा दक्षिण कोरियामाथि साँघुरो जित निकाल्दै २०२६ विश्वकपको नकआउट चरणमा छनोट हुने पहिलो राष्ट्र बनेको छ ।
खेलको ५० औं मिनेटमा दक्षिण कोरियाली गोलकिपर किम सेउङ-ग्यु आफ्नै टोलीका साथी ली गी-ह्युकसँग ठोक्किएर बल फुत्किएपछि, मेक्सिकन मिडफिल्डर लुइस रोमोले सही समय र सही स्थानको फाइदा उठाउँदै खाली पोस्टमा गोल गरेका थिए ।
दक्षिण कोरियाले ८७ औं मिनेटमा गोल गर्ने उत्कृष्ट अवसर पाएको थियो, तर चो ग्वे-सुङको नजिकैबाट प्रहार गरिएको हेडरलाई राउल रान्जेलले बचाएका थिए । त्यसपछि आएको याङ ह्युन(जुनको प्रहारलाई पनि मेक्सिकन गोलकिपरले रोक्न सफल भए ।
यस अघि कप्तान सन ह्युङ-मिनले रान्जेलमाथिबाट चिप गरेर गोल गर्न खोजेको प्रहारलाई एडसन अल्भारेजले गोललाइनबाट क्लियर गरेका थिए । यद्यपि पूर्व टोटनह्याम फरवार्ड सन पहिले नै अफसाइड भइसकेका थिए ।
खेलको पहिलो हाफमा फितलो प्रदर्शन गरेपछि घरेलु समर्थकहरूले टोलीको हुटिङ (नाराबाजी) गरेका थिए । तर दोस्रो हाफमा उत्साही समर्थकको साथ पाएको मेक्सिकोले ७५ औं मिनेटमा झण्डै दोस्रो गोल थपेको थियो । तर राउल जिमेनेजको साँघुरो कोणबाट गरिएको प्रहारलाई गोलकिपरले बचाए ।
वैकल्पिक खेलाडी ओबेद वर्गासको शक्तिशाली प्रहारलाई पनि किमले डाइभ गर्दै उत्कृष्ट बचाउ गरेका थिए ।
यो नतिजासँगै मेक्सिकोले विश्वकपमा आफ्नो शतप्रतिशत जितको यात्रालाई जारी राखेको छ र जाभियर एगुइरेको टोली समूह ‘ए’ को विजेताका रूपमा अघि बढ्ने पक्का भएको छ।
यसको अर्थ सह(आयोजक मेक्सिकोले आफ्नो अन्तिम ३२ र सम्भावित अन्तिम १६ का दुवै खेल मेक्सिको सिटीमा खेल्नेछ । यदि थोमस टुचेलको नेतृत्वमा रहेको इङ्गल्याण्डले आफ्नो समूह र पहिलो नकआउट खेल जितेमा, मेक्सिकोले इङ्गल्याण्डको सामना गर्न सक्नेछ ।
हारका बाबजुद दक्षिण कोरिया अघिल्लो चरण प्रवेशका लागि अझै पनि राम्रो स्थितिमा छ, जसको श्रेय चेक गणतन्त्रविरुद्धको पहिलो खेलमा हात पारेको जितलाई जान्छ ।
दक्षिण कोरियाले अब बिहीबार मोन्टेरेमा दक्षिण अफ्रिकाको सामना गर्नेछ । सोही समयमा मेक्सिकोले मेक्सिको सिटीमा चेक गणतन्त्रसँग आफ्नो अन्तिम समूह खेल खेल्नेछ ।
