बर्दिया । बर्दियाको गुलरिया नगरपालिका–११ लालपुरमा शनिबार बिहान भएको सवारी दुर्घटनामा सशस्त्र प्रहरी सहायक हवलदारको मृत्यु भएको छ । दुर्घटनामा एक जना सशस्त्र प्रहरी जवान र ट्रक चालक घाइते भएका छन् ।
मृत्यु हुनेमा बर्दिया बासगढी नगरपालिका–५ मोतीपुर बस्ने अन्दाजी ३५ वर्षीय सशस्त्र प्रहरी सहायक हवलदार तिलक कँडेल रहेका छन् । फर्वाड अपरेटिङ बेस (एफओबी) गणेशपुर, बर्दियामा कार्यरत कँडेलको उपचारको क्रममा मृत्यु भएको हो ।
आज बिहान अवैध रूपमा भारततर्फ लैजान लागिएका २ वटा भैँसी र १ वटा पाडो नियन्त्रणमा लिएर भन्सार कार्यालय गुलरियातर्फ लैजाने क्रममा हुलाकी सडक खण्डको लालपुरमा नेपालगञ्जबाट गुलरियातर्फ आउँदै गरेको बा.प्र.०३–००१ ख १४१२ नम्बरको ट्रकले ठक्कर दिएको थियो ।
दुर्घटनामा बर्दिया बासगढी नगरपालिका–८ ककौरा घर भएका अन्दाजी ३५ वर्षीय सशस्त्र प्रहरी जवान दीपक कुमार जङ शाह घाइते भएका छन् । उनको अवस्था मध्यम रहेको र प्रारम्भिक उपचारपछि थप उपचारका लागि नेपालगञ्ज मेडिकल कलेज कोहलपुर, बाँके रिफर गरिएको छ ।
यस्तै ट्रक चालक मकवानपुर बागमती गाउँपालिका–५ समरी बस्ने अन्दाजी ४० वर्षीय निरञ्जन दर्जी पनि घाइते भएका छन् । उनको जिल्ला अस्पताल गुलरियामा उपचार भइरहेको छ ।
