काठमाडौँ । आफूविरुद्धको मुद्दाबाट सफाइ नपाउँदै भुवन गिरीलाई न्यायाधीश पदमा पुनर्बहाली गरिएको भन्दै पीडित आरती रावल पुनः आमरण अनसन बस्ने भएकी छन्।
बिहीबार राजधानीको संवाद डबलीमा पत्रकार सम्मेलनको आयोजना गरी रावलले दार्चुला जिल्ला अदालतका तत्कालीन न्यायाधीश गिरीलाई तत्काल निलम्बन गर्न माग गरेकी हुन्।
पीडित रावलले तीनै तहका अदालतमा गिरीविरुद्ध मुद्दा चलिरहेको अवस्थामा महान्यायाधिवक्ताको कार्यालयबाट मुद्दा नचल्ने निर्णय गराई उनलाई पुनर्बहाली गरिएको आरोप लगाइन्। सत्ता र शक्तिको दुरुपयोग गरेर आफूले न्याय नपाउँदै पीडक गिरीलाई पुनर्बहाली गर्नु कानुनी राज्यको धज्जी उडाउनु रहेको रावलको जिकिर छ। उनले भनिन्, ‘गैरकानुनी राजनीतिक नियुक्ति पाएका गिरीको सर्वोच्च अदालतमा बलात्कार मुद्दा विचाराधीन रहेकाले न्यायाधीश भुवन गिरीलाई तुरुन्त निलम्बन गरियोस्।’
विगतका समयमा अदालतप्रति जनताको आस मर्दै गए पनि वर्तमान समयमा न्यायालयप्रति भरोसा बढ्दै गएको बताउँदै रावलले भनिन्, ‘बालेन सरकारले न्यायालयको शुद्धीकरणको सङ्केत दिएको हो भने, भुवन गिरीलाई तत्काल निलम्बन गरेर देखाओस्, सर्वोच्च अदालत मेरा मिसिलका एक–एक प्रमाणहरू केलाएर मलाई न्याय गरियोस्।’
विगतमा अदालत पनि शक्तिको प्रभावमा परेको आरोप लगाउँदै रावलले प्रश्न गरिन्, ‘के न्यायाधीशलाई कानुन लाग्दैन? निष्पक्ष हुन्छ भनेको अदालतबाट अपराधी न्यायाधीशको संरक्षण किन? तीनै तहका न्यायालयबाट सफाइ नपाउँदै पुनर्बहाली किन? नैतिकताको आधारमा पनि उनी न्यायाधीश जस्तो पदमा बस्न मिल्छ?’
