काठमाडौँ । परराष्ट्र मन्त्रालयले आज परराष्ट्र सेवा दिवस मनाइरहेको छ । वि.सं.२०७९ देखि यो दिवस प्रत्येक वर्ष जेठ १० गतेका दिन मनाउने गरिएको हो ।
वि.सं. २०१८ जेठ १० गतेका दिन ‘नेपाल वैदेशिक सेवा (गठन र श्रेणी विभाजन) नियमहरू, २०१८’ तर्जुमा भई नेपाल राजपत्रमा प्रकाशित भएको थियो । नेपालको निजामती सेवाभित्र परराष्ट्र सेवालाई कानुनी रूपमा प्रवेश गराएको ऐतिहासिक दिनको संस्मरणमा यो दिवस मनाउन थालिएको परराष्ट्र मन्त्रालयले जनाएको छ ।
परराष्ट्र मन्त्रालयले २०७८ फागुनमा हरेक वर्ष जेठ १० गते परराष्ट्र सेवा दिवसका रूपमा मनाउने निर्णय गरेको थियो । सोही अनुरूप २०७९ जेठ १० गते पहिलोपटक औपचारिक रूपमा यो दिवस मनाइएको थियो ।
नेपाली कांग्रेसका नारायण खड्का परराष्ट्र मन्त्री रहेको बेला यो दिवस मनाउन सुरु गरिएको हो ।
यो दिवसमा परराष्ट्रको क्षेत्रमा कार्यरत उत्कृष्ट कर्मचारीहरूलाई सम्मान गर्ने गरिएको छ । आज पनि कर्मचारी तथा त्यस क्षेत्रमा लागेका व्यक्तिहरूलाई सम्मान गर्ने कार्यक्रम रहेको बताइएको छ ।
