काठमाडौँ । वीरगन्जस्थित नेशनल मेडिकल कलेजले आवासीय चिकित्सकहरूमाथि कडा र अपमानजनक नियमहरू लादेको भन्दै नेपाल चिकित्सक सङ्घले गम्भीर आपत्ति जनाएको छ। कलेज प्रशासनले चिकित्सकहरूको व्यक्तिगत स्वतन्त्रता र पेसागत मर्यादामा आँच पुर्याउने कार्य गरेको भन्दै सङ्घले ती निर्णयहरू अविलम्ब फिर्ता लिन चेतावनी दिएको हो।
सङ्घका महासचिव डा.सञ्जीव तिवारीद्वारा जारी विज्ञप्तिअनुसार, नेशनल मेडिकल कलेजले आवासीय चिकित्सकहरूका लागि आवास, खाना र इन्टरनेट बापतको शुल्क वार्षिक रूपमा बुझाउन अनिवार्य गरेको छ।
चिकित्सकहरूलाई उनीहरूको इच्छा विपरीत अनिवार्य होस्टेल बस्न बाध्य पारिएको र भर्नाका क्रममा चिकित्सकहरूका सक्कल प्रमाणपत्रसमेत कलेजले आफ्नो नियन्त्रणमा राखेको तथ्य बाहिर आएको छ।
यति मात्र नभई, कलेजले चिकित्सकहरूलाई दिनमा चार पटकसम्म हाजिर गर्न बाध्य पारेर मानसिक दबाब दिने गरेको गुनासो सङ्घमा पुगेको छ।
सङ्घले यी कार्यहरूलाई चिकित्सकहरूको आत्मसम्मान र व्यक्तिगत स्वतन्त्रताको हनन भन्दै कडा शब्दमा भर्त्सना गरेको छ। ‘चिकित्सक जस्तो जिम्मेवार पेसाकर्मीलाई चौबीसै घण्टा निगरानीमा राख्ने र उनीहरूको शैक्षिक कागजात कब्जा गर्ने कार्य कुनै पनि अर्थमा न्यायोचित हुन सक्दैन,’ विज्ञप्तिमा उल्लेख छ।
नेपाल चिकित्सक सङ्घले कलेज प्रशासनलाई आफ्ना गलत निर्णयहरू तत्काल सच्याउन र चिकित्सकहरूलाई मर्यादित वातावरणमा काम गर्ने सुनिश्चितता प्रदान गर्न जोडदार माग गरेको छ।
