काठमाडौँ । पछिल्लो २४ घण्टामा देशका छुट्टाछुट्टै स्थानमा भएका सवारी दुर्घटनामा ६ जनाको मृत्यु भएको छ । कञ्चनपुर, रूपन्देही, चितवन र दाङमा भएका यी दुर्घटना भएका हुन् ।
सबैभन्दा भयावह दुर्घटना कञ्चनपुरको कृष्णपुर नगरपालिका–१ कुगडामा भएको छ जहाँ एउटा जीप अनियन्त्रित भएर सडकमा पल्टिँदा तीन जनाको ज्यान गएको छ । से १ ज २९० नम्बरको जीप दुर्घटना हुँदा चालक २४ वर्षीय अर्जुन साउद, ६० वर्षीय नन्दराम पार्की र ६२ वर्षीया कलावती देवी बोहराको मृत्यु भएको हो । नन्दराम र कलावतीको घटनास्थलमै मृत्यु भएको थियो भने चालक अर्जुनको धनगढीस्थित निसर्ग अस्पतालमा उपचारका क्रममा प्राण गएको हो । उक्त दुर्घटनामा घाइते भएका अन्य ५ जनाको सोही अस्पतालमा उपचार भइरहेको छ ।
यस्तै रूपन्देहीको सिद्धार्थनगर नगरपालिका–१० शंकरपुरमा पनि एक दर्दनाक दुर्घटना भएको छ । बाटोको छेउमा रोकिराखेको नम्बर नखुलेको ट्याक्टरको ट्रलीमा लु ६ प ३०५८ नम्बरको मोटरसाइकल ठोक्किँदा ५२ वर्षीय नारायण बहादुर यादवको मृत्यु भएको छ । मर्चवारी गाउँपालिका–३ मधुवनी निवासी यादवको भैरहवास्थित भीम अस्पतालमा उपचारका क्रममा मृत्यु भएको हो ।
चितवनको माडी नगरपालिका–८ खरकट्टामा पनि बसको ठक्करबाट एक पैदलयात्रीले ज्यान गुमाएकी छिन् । बा प्र ०६–००१ ख ०२०४ नम्बरको बसले ठक्कर दिँदा १८ वर्षीया प्रिती परियारको मृत्यु भएको छ । बसको ठक्करबाट गम्भीर घाइते भएकी प्रितीको माडीस्थित बघौडा अस्पतालमा उपचारको क्रममा मृत्यु भएको हो । प्रहरीले ठक्कर दिने बसका चालकलाई नियन्त्रणमा लिएर कानुनी कारबाही अगाडि बढाएको छ ।
दाङको गढवा गाउँपालिका–८ चिसापानीमा भएको अर्को मोटरसाइकल दुर्घटनामा १९ वर्षीय मनोज चौधरीको ज्यान गएको छ । रा २ प ४४५९ नम्बरको मोटरसाइकल अनियन्त्रित भई दुर्घटना हुँदा सवार चौधरी गम्भीर घाइते भएका थिए । उनको कोहलपुरस्थित मेडिकल कलेजमा उपचारका क्रममा मृत्यु भएको हो । उक्त दुर्घटनामा घाइते भएका मोटरसाइकल चालकको बाँकेस्थित सागर हस्पिटलमा उपचार भइरहेको छ । प्रहरीले यी सबै दुर्घटनाका सम्बन्धमा थप अनुसन्धान गरिरहेको छ ।
