काठमाडौँ । नेपाली कांग्रेसका नेता गुरुराज घिमिरेले पार्टीको महाधिवेशन मिति तोक्न ढिलाइ गरेकोमा नेतृत्वको चर्को आलोचना गरेका छन् ।
विशेष महाधिवेशनको पक्षमा हस्ताक्षर अभियान नै चलाएका समूहलाई साथमा राखेर आइतबार पत्रकार सम्मेलन गर्दै घिमिरेले केन्द्रीय कार्यसमितिले अस्वाभाविक रूपमा केन्द्रीय समिति बैठक लम्ब्याएको समेत आरोप लगाए ।
‘पार्टी केन्द्रीय कार्यसमितिले अस्वाभाविक रूपमा केन्द्रीय समितिको बैठक लम्ब्याएको छ’, घिमिरेले भने, ‘हामी यसरी किन बैठक सारिरहेका छौ, आज जनमानसले प्रश्न गरिरहेको छ ।’
उनले केन्द्रीय कार्यसमिति महाधिवेशन भन्दा उच्च नभएको भन्दै महाधिवेशनको आदेशलाई पालना गर्नुपर्ने बताए ।
‘अरू राजनीतिक दल र कम्युनिस्ट पार्टीहरूले मङ्सिरमा महाधिवेशन गर्ने निर्णय गरिसके’, उनले भने, ‘हामीलाई के ले रोक्यो ? हामीले आफूलाई विश्वको प्रजातान्त्रिक आन्दोलनको नमुना मान्छौ ।’
उनले नियमित र विशेष महाधिवेशन गर्ने दुईवटा बाटो रहेको र नेपाली कांग्रेसले आफूलाई प्रजातान्त्रिक गुरुकुलको प्रचार्य ठान्ने तर मुख्य नेताहरूले नै आफ्नो भूमिका निर्वाह गर्न नसकेको भन्दै आक्रोश पोखे ।
कांग्रेसको केन्द्रीय समिति बैठक आगामी कात्तिक १३ गतेलाई बोलाएको छ ।
