काठमाडौँ । अवकाशप्राप्त प्रहरी नायव महानिरीक्षक कृष्णबहादुर रानालाई लाइफ टाइम अचिभमेन्ट अवार्ड प्रदान गरिएको छ । ७० औँ प्रहरी दिवसको अवसरमा उनलाई सो अवार्ड प्रदान गरिएको प्रहरी प्रधान कार्यालयले जनाएको छ ।
२०३५ मा इन्स्पेक्टरबाट प्रहरी सेवामा प्रवेश गरेका रानाले २०६५ असोजमा अनिवार्य अवकाश पाएका थिए । शुक्रवार प्रहरी प्रधान कार्यालयमा आयोजित समारोहमा गृहमन्त्री ओमप्रकाश अर्यालले रानालाई अवार्ड हस्तान्तरण गरे ।
पूर्वडीआईजी राना २०११ मा दाङको घोराहीमा जन्मेका थिए । काठमाडौँको महाराजगन्जमा बस्दै आएका उनले प्रहरी सेवामा रहँदा चुनौतीपूर्ण काम कुशलतापूर्वक सम्पन्न गरेको प्रहरी प्रधान कार्यालयको विश्लेषण छ ।
उनले पाटन क्याम्पसबाट स्नातक तह पुरा गरेका थिए । २०६३ साउनमा डीआईजी पदमा बढुवा भएका रानाले प्रहरी सेवा पदक र विख्यात त्रिशक्तिपट्ट सहितका पदक प्राप्त गरेका थिए ।
