काठमाडौं । संवैधानिक परिषद्को बैठकमा प्रमुख प्रतिपक्षी नेपाली कांग्रेसका सभापति शेरबहादुर देउवा नजाने भएका छन् ।
देउवाले शनिबार विज्ञप्ति जारी गर्दै संविधानको मुल मर्ममा प्रहार गरि संवैधानिक संरचनालाई नै भत्काउने गरी अध्यादेश जारी गरि बस्न लागेको बैठकमा आफू नजाने बताएका हुन् ।
प्रधानमन्त्री केपी शर्मा ओलीले विभिन्न संवैधानिक निकायमा नियुक्तिका लागि सिफारिस गर्न आइतबार संवैधानिक परिषद्को बैठक बोलाएका छन्।
देउवाले बैठकमा भाग नलिन परिषद्का सदस्यहरुलाई समेत आव्हान गरेका छन् । उनको आग्रह छ ‘सवैधानिक परिषद् सम्बन्धि ऐनमा अध्यादेश मार्फत संशोधन गर्ने सरकारको काम संविधानको भावना विपरित, संसदीय मुल्य, मान्यता प्रतिकुल र लोकतान्त्रिक अभ्यासमा समेत प्रहार हुने भएको हुदा उक्त बैठकमा भाग नलिन परिषद्का अन्य सबै सदस्यहरुलाई समेत आव्हान गर्दछ।’
अध्यादेश मार्फत सविधानको संरचना नै भत्किने गरि पटक–पटक अध्यादेश जारी गर्ने काम भएको देउवाको आरोप छ। बैठकमा सभामुख अग्निप्रसाद सापकोटा समेत नजाने भएका छन् ।
