काठमाडौँ । नेपाल कृषि अनुसन्धान परिषद्ले आफ्ना केही स्थायी कर्मचारीहरूलाई अध्ययन बिदाको क्रममा तोकिएको सर्त उल्लङ्घन गरेको भन्दै स्पष्टीकरण पेस गर्न निर्देशन दिएको छ।
परिषद्को सामान्य प्रशासन महाशाखा, सिंहदरबार प्लाजाले जारी गरेको सूचना अनुसार, कर्मचारीहरूले अध्ययन बिदामा जान स्वीकार गरी कबुलियतनामा गरेपनि निर्धारित समयमा हाजिर हुन नआएको र परिषद्को सर्त उल्लङ्घन गरेको उल्लेख छ ।
सूचनामा उल्लिखित अनुसार, परिषद्को मिति २०६१।१२।३१ मा बसेको ६६औं बैठकको निर्णयानुसार अध्ययन बिदामा गएका कर्मचारीहरूले तोकिएको मितिबाट सेवाबाटै बाहिरिएको सरह मानिने व्यवस्था छ। यसरी अनुपस्थित रहँदै आएका कर्मचारीहरूले किन नोकरीबाट अलग नगरिने वा नगर्नु पर्ने कारणबारे पत्र प्राप्त भएको मितिले सात दिनभित्र स्पष्टीकरण पेस गर्नुपर्नेछ।
कर्मचारीहरूले तोकिएको समयभित्र आफ्नो घर ठेगानामा पत्राचार गर्दा पनि उपस्थित नभएमा वा स्पष्टीकरण नदिएमा परिषद्को नियमानुसार कारबाही गरिने स्पष्ट पारिएको छ।
