काठमाडौँ । पूर्व प्रधानमन्त्री झलनाथ खनालले दलहरू बन्नु र विभाजन हुनु पुँजीवादी चरित्र भएको बताएका छन् । बिहीबार वामपन्थी नेता निर्मल लामाको २५ औँ स्मृति दिवसको अवसरमा काठमाडौँमा आयोजित कार्यक्रममा बोल्दै खनालले यस्तो अवस्थामा जुनसुकै आए पनि काम गर्न नसक्ने बताएका हुन् ।
‘दलीय व्यवस्थामा दलहरू बन्नु स्वाभाविक हुन्छ । दलीय व्यवस्था भनेको पुँजीवादी व्यवस्था हो । पुँजीवादमा दलहरू बनिरहन्छन्, भत्किरहन्छन् । यो पुँजीवादको चरित्र हो’, उनले भने, ‘पुँजीवादी संविधानमा कति सङ्ख्याले सरकार बन्ने र कति सङ्ख्याले ढल्ने भनेर लेखेको हुन्छ । सरकार जति तलमाथि भए पनि क्रान्तिकारी कार्यदिशा छैन भने केही हुनेवाला छैन ।’
उनले २०७४ सालमा वामपन्थीको झन्डै दुई तिहाइ मत प्राप्त गरे पनि नेकपालाई जोगाउन नसक्नु कमजोरी भएको बताए ।
