काठमाडौं । राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रमाथि प्रहरीले अपमानजनक व्यवहार गरेको छ । आज म्याद थपका लागि जिल्ला अदालत काठमाडौं लैजाने क्रममा उनलाई दुवै हातमा हत्कडी लगाइएको थियो ।
प्रहरीले थुनुवाको पोशाकमा गाडीबाट ओर्लेर हत्कडी सहित अदालत लैजाँदै गर्दा प्रहरीले उनलाई धकेलेको भिडिओ सार्वजनिक भएको छ । मिश्रले हत्कडीसहितको हात उठाएर अदालततर्फ ‘नमस्कार’ गर्न खोजे । तर, प्रहरीले उनको हातमै समातेर रोके ।
प्रहरीले रोक्दै गर्दा मिश्रले भनेका थिए,अदालतलाई नमस्कार गर्नुपरेन ?
घटनास्थलमा रहेका राप्रपा केन्द्रीय सदस्य रञ्जन कार्कीले प्रहरीबाट ज्यादतिपूर्ण व्यवहार देखाइएको बताए । ‘राजनीतिक आन्दोलनमा सहभागी भएकै कारण एउटा प्रमुख दलको वरिष्ठ उपाध्यक्षलाई यो किसिमको व्यवहार गरिनु भत्र्सनापूर्ण छ’, उनले भने ।
यसअघि पनि मिश्रलाई अदालत ल्याउँदा हत्कडी लगाउने गरिएको थियो । तर, गाडीबाट ओराल्ने बेलामा हत्कडी खोल्ने गरिन्थ्यो । तर, आज भने गाडीबाट ओर्लिँदा पनि हत्कडी फुकालिएन ।
गृहमन्त्री रमेश लेखकले मिश्रकै नाम लिएर उनलाई कडाई गर्न प्रहरीलाई निर्देशन दिएको प्रहरी स्रोतले दावी गरेको छ । प्रहरीको गुनासो छ, कडाई नगर्दा जागिर जाने डर, कडाई गर्दा जनताको गालि खानु पर्ने अवस्था छ । दोधारमा परेको प्रहरी अधिकारीहरुले बताउने गरेका छन ।
