एजेन्सी । इजरायलले हमास र हिजबुल्लाहका शीर्ष कमाण्डर माथि आक्रमण गरेपछि मध्यपूर्वमा तनाव झन् बढ्न सक्ने भन्दै संयुक्त राष्ट्रसंघले चिन्ता व्यक्त गरेको छ ।
इजरायल र हमासबीच युद्धविरामको प्रयास भइरहेका बेला इरानमा हमासका शीर्ष कमाण्डर स्माइल हानिया र लेबनानमा हिज्बुल्लाहका शीर्ष कमाण्डर फुआद शुक्रमाथि हमला भएको थियो । मिडिया रिपोर्टका अनुसार ती दुबै शीर्ष कमाण्डहरुको मृत्यु भइसकेको छ ।
हमास, हिजबुल्लाह र उनीहरुलाई साथ दिँदै आएको इरानले यो आक्रमणको जवाफ दिने घोषणा गरिसकेका छन् । त्यसैले मध्यपूर्वमा तनाव बढ्ने भन्दै चिन्ता व्यक्त भएको हो ।
संयुक्त राष्ट्रसंघका प्रवक्ता स्टेफान दुजेरिकले बुधबार न्यूयोर्क मुख्यालयमा नियमित पत्रकार सम्मेलनमा मध्यपूर्वमा तनावको अवस्था खतरनाक हुन सक्ने बताएका छन् ।
गाजा क्षेत्रमा युद्धविराम गर्ने, इजरायली बन्धकहरुलाई रिहा गराउने, गाजा क्षेत्रमा प्यालेस्टिनी जनतालाई मानवीय सहायता बढाउने शान्ति बहाल गराउने प्रयास भइरहेका बेला ती लक्ष्य प्राप्तिलाई थप कमजोर बनाउने प्रयास भइरहेको प्रवक्ता दुजरिकको भनाइ छ ।
इजरायलले गत मंगलबार लेबनानको राजधानी बेरुतको एक घना बस्ती भएको क्षेत्रमा हमला गरेको थियो । सो हमला हिजबुल्लाहका शीर्ष कमाण्डर फुआद शुक्रप्रति लक्षित थियो । यसैगरी बुधबार बिहान इरानको राजधानी तेहरानमा हमासका राजनीतिक नेता इस्माइल हानियामाथि आक्रमण भएको थियो ।
संयुक्त राष्ट्रसंघका प्रवक्ता दुजरिकका अनुसार महासचिव एन्टोनियो गुटेरेसले सबै पक्षलाई अधिकतम संयमता अपनाउन आह्वान गरेका छन् । तर स्थिति अत्यन्त संवेदनशील रहेकाले केवल संयमता मात्रै पर्याप्त छैन । उनका अनुसार महासचिव गुटेरेसले मध्यपूर्वमा दीर्घकालीन शान्ति र स्थीरताका लागि तनाव अन्त्यका लागि काम गर्न आह्वान गरेका छन् ।
१७ श्रावण २०८१, बिहीबार ०८:४२ मा प्रकाशित
