16, Jul, 2024

पाल्पाको बगनासकाली कांग्रेस र माओवादी केन्द्रबाट निर्वाचित जनप्रतिनिधिले १६औं गाउँसभाको अन्तिम बैठक बहिष्कार

बागमती भ्वाइस
बागमती भ्वाइस
२७ असार २०८१, बिहीबार ०८:०४ | ५ दिन अगाडी

पाल्पा । पाल्पाको बगनासकाली गाउँपालिकामा कांग्रेस र माओवादी केन्द्रबाट निर्वाचित जनप्रतिनिधिले १६औं गाउँसभाको अन्तिम बैठक बहिष्कार गरेका छन् ।
कार्यपालिकाका तीन र १४ जना गाउँसभा सदस्यले सभाको बहिष्कार गरेका हुन् । अधिवेशनमा गाउँपालिका सरकारले प्रस्तुत गरेको नीति तथा कार्यक्रम अनुसारको बजेट नआएको उनीहरुको आरोप छ ।

संयुक्त विज्ञप्ति जारी गर्दै जनताका सरोकारका विषयबस्तुलाई उपेक्षा गरिएको, वडागत, विषयगत रुपमा विनियोजन बजेट न्यून भएको आरोप उनीहरुले लगाएका छन् ।

जनप्रतिनिधिलाई उपेक्षित गरी पार्टिगत रुपमा योजना छनोट गरी बजेट व्यवस्था गरेको, सरकार जनउत्तरदायीभन्दा विलाशितातर्फ उन्मुख रहेको, कार्यपालिकामा उठाइएका कुनै पनि प्रश्नको उत्तर सन्तोषजनक नभएको आरोप छ ।

सरकार दलगत स्वार्थ र कार्यकर्ताउन्मुख भएको, लेखा संयोजकले मागेका विविध शीर्षकमा गरिएको खर्चको विवरण उपलब्ध गराउँदा छलछाम गरिएको आरोप उनीहरुले सभामा दर्ता गरेको विरोधपत्रमा उल्लेख गरेका छन् ।

आर्थिक वर्ष २०८१/८२ को बजेटमा असन्तुष्ट जनाउनेमा कांग्रेसका १६ र माओवादीका एक जना छन् । नौ वडा रहेको बगनासकालीमा ५२ सदस्यीय गाउँसभा छ ।

विनियोजन विधेयकमाथि छलफल गर्न राखिएको बैंठकमा शून्य समयमा कांग्रेसबाट निर्वाचित वडाध्यक्ष थानेश्वर तिमिल्सेनाले आफ्ना कुरा राख्दा प्रवक्ता टीका थापाले बोल्न रोकेपछि सभा बहिष्कार गरेको बताए ।

कार्यपालिकामा छलफल नगरी रातारात एक करोड ७५ लाखका ७८ वटा योजना तयार गरेर बजेटमा समावेश गरेको मुख्य विषय भएको वडाध्यक्ष तिमिल्सेनाले बताए ।

लेखा समितिका संयोजक कृष्णप्रसाद बस्यालले लेखा समितिले हिसाब माग गर्दासमेत नदिई अपादर्शी ढंगले काम गरेको बताए ।

माओवादी केन्द्रबाट निर्वाचित वडासदस्य कृष्ण भुसालले आफूखुसी गाउँसभा सञ्चालन गरेकाले बहिष्कार गर्नु परेको बताए ।

गाउँपालिका अध्यक्ष सरस्वती चिदी दर्लामीले चित्त नबुझेमा संशोधन हाल्न सकिने व्यवस्था हुँदाहुँदै उठेर हिडेको बताइन् ।

छलफलका लागि समय दिने भन्दाभन्दै उठेर हिंडेको उनको भनाइ छ । ‘प्रस्ताव गरेको मात्र थियौं, पास भइसकेको थिएन । छलफल गर्न सकिन्थ्यो,’ उनले भनिन् ।

आर्थिक विधेयक र विनियोजन विधेयकमाथि छलफल गर्न अन्तिम सभा राखेको उनले बताइन् ।

२७ असार २०८१, बिहीबार ०८:०४ मा प्रकाशित

Discover more from Bagmati Voice

Subscribe now to keep reading and get access to the full archive.

Continue reading