काठमाडौं । रामबाबु गुरुङको निर्देशनमा निर्माण भएको सिनेमा ‘डिग्री माइला: एमए थर्ड क्लास’ अमेरिकामा पनि प्रदर्शन हुने भएको छ । आगामी शुक्रवार रिलिज हुने फिल्म ११ अप्रिलबाट अमेरिकाको विभिन्न राज्यमा प्रदर्शन हुने तय भएको हो ।
सिनेमाको डायस्पोरा रिलिज अधिकार खरिद गरेको कम्पनी सेभेन सिज इन्टरटेनमेन्टले आइतबार एक विज्ञप्ति जारी गर्दै अमेरिकामा अग्रिम टिकट बुकिङ खुल्ला गरिएको जानकारी दिएको छ ।
अभिनेता बुद्धि तामाङको उपस्थितिमा नेपालीहरूको बाक्लो बसोबास रहेको लेकवुडको स्टार सिनेमा घरमा प्रिमियर शोको समेत आयोजना गरिँदैछ ।
अप्रिल १२ बाट भने चलचित्र अमेरिकाको लस एञ्जलस, डलास, ओहायो, पेन्सिलनेनिया र न्युयोर्क राज्यका १० बढी सहर तथा १९ अप्रिलबाट अमेरिकाकै सान फ्रान्सिस्को २० बढी शहरका सिने लाउन्ज, रिचमण्ड सिनेमार्कमा प्रदर्शन हुनेछ । अनि अप्रिल २६ बाट डेनभर कोलोराडो, एरिजोनामा रिलिज गर्ने तयारी छ ।
सिनेमा अप्रिल र मेको पहिलो सातामा अमेरिकामा करिब ७०० शो र ४० देखि ६० हजार दर्शकलाई सिनेमा देखाउने टार्गेट रहेको सेभेज सिजले जनाएको छ ।
अमेरिकाका ४० बढी थिएटरमा दैनिक बक्सअफिस र टिकटसहित चलचित्र रिलिज गरिनेछ । चलचित्रको टिकट अनलाइन www.nepal11.com मा उपलब्ध हुनेछ ।
२५ चैत्र २०८०, आईतवार १२:२८ मा प्रकाशित
