जनकपुरधाम । जनमत पार्टीले मधेश प्रदेश सरकारको नेतृत्व बदल्ने सहमतिपछि मात्र नयाँ गठबन्धनको सरकारमा सहभागी हुने भएको छ ।
जनमतको आज बसेको सचिवालय बैठकले मधेश सरकारको नेतृत्व फेरिए मात्र सरकारमा सहभागी हुने बटम लाइन तय गरेको हो ।
मधेश प्रदेशमा जसपाले नेतृत्व गरिरहेको छ । जसपा संसदीय दलका नेता सरोज कुमार यादव मुख्यमन्त्री छन् । जसपासँगै विवादका कारण जनमत सरकारबाट बाहिरिएको थियो ।
त्यसैले अब जसपाबाट नेतृत्व खोसिने ग्यारेन्टी भए मात्र नयाँ गठबन्धनको सरकारमा सहभागी हुने शर्त जनमतले राखेको छ ।
सचिवालय बैठकपछि जनमतका सचिव बिपी साहले भने, ‘मधेश प्रदेशको नेतृत्व जनमतलाई दिनुपर्ने विषयमा छलफल भयो । हामीलाई नेतृत्व नदिए जसपा बाहेकले नेतृत्व गर्नुपर्छ । यसमा सहमति भएपछि मात्र सरकारमा जानेछौँ ।’
उनले सरकारमा सम्मानजनक सहभागिता चाहेको बताए । उनले भने, ‘मन्त्री दिने तर सहकार्य र समन्वय नगर्ने समस्या विगतमा देखियो । यो समस्या आउनु हुँदैन् । यस विषयमा पनि सहमति हुनुपर्छ ।
२१ फाल्गुन २०८०, सोमबार १६:०४ मा प्रकाशित
