12, Apr, 2024

झण्डै ६ अर्ब बक्यौता भुक्तानीको माग राख्दै दुग्ध किसानले गरे आन्दोलन घोषणा

बागमती भ्वाइस
बागमती भ्वाइस
१० फाल्गुन २०८०, बिहीबार १५:४४ | १ महिना अगाडी

काठमाडौं । दूध उत्पादक किसानहरूले दूधको रकम भुक्तानी र बिक्री वितरण सहजीकरण गर्न माग गर्दै आन्दोलनको घोषणा गरेका छन् ।

दुग्ध उत्पादक किसानहरूको विभिन्न संघसंस्थाले बिहीबार काठमाडौंमा संयुक्तरूपमा पत्रकार सम्मेलन गर्दै विभिन्न १६ बुँदे मागका साथ आन्दोलनको घोषणा गरेका हुन् । उनीहरूले केही समयदेखि उत्पादित दूधमध्ये प्रतिदिन ५ देखि ६ लाख लिटर बिक्री वितरण हुन नसकेको अवस्थामा बिक्री गरिएको दूधको करिब ६ अर्ब बराबरको बक्यौता रकम दुग्ध विकास संस्थानलगायत निजी डेरी उद्योगहरूले किसानलाई नदिएको जनाएका छन् ।

उनीहरूले दूधको बाँकी वक्यौता भुक्तानी हुनुपर्ने, किसानले उत्पादन गरेको दूध खरिद गर्ने व्यवस्था मिलाउनुपर्ने, दूधको बिक्री मूल्य निर्धारण हुनुपर्ने, बिक्री नभएको दूधलाई पाउडर बनाएर देशलाई मिल्क होलिडे हुनबाट रोक्नुपर्ने, वीमित किसानहरूको रकम भुक्तानी गर्ने व्यवस्था गर्नुपर्नेलगायतका माग अघि सारेका छन् ।

आफूहरूको माग पूरा गर्न शीर्ष नेताहरूलाई ज्ञापन पत्र बुझाउने, देशभरका प्रशासन कार्यालयमा धर्नासहित ज्ञापन पत्र बुझाउने, मुख्य राजमार्गहरुमा चक्काजाम गर्ने र फागुन २१ गतेदेखि निरन्तररूपमा माइतीघरमा धर्नासहित विरोध कार्यक्रम गर्ने नेपाल दुग्ध व्यवसायी संघका अध्यक्षका अध्यक्ष विश्वराज घिमिरेले जानकारी दिए ।

केन्द्रीय दुग्ध सहकारी संघ नेपालका वरिष्ठ उपाध्यक्ष कृष्णप्रसाद सापकोटाले बजारमा पठाइएको दूधको बक्यौता नउठेको बताए । दूध किसानहरूलाई मर्का परेको भन्दै राज्यले ध्यान दिनुपर्ने उनको भनाइ छ । सहकारीले दैनिक १२ लाख लिटर संकलन गरी वितरण गरिरहेको अवस्थामा अहिले दूध नै बिक्री हुन नसकेकाले सडकमा जान बाध्य भएको सापकोटाले बताए ।

दूध उत्पादन क्षेत्रमा कहिल्यै नदेखिएको समस्या उत्पन्न भएको किसानहरुको गुनासो छ । नेपालभन्दा भारतमा दूध सस्तो हुँदा सीमावर्ती नाका भएर दूध भित्रिँदा नेपाली दूधको बजार घटेको उनीहरूले बताएका छन् । नेपालमा हाल ६५ देखि ७० लाख लिटर दूध उत्पादन हुने गरेको तथ्याङ्क छ भने करिब ३० लाख घरपरिवार प्रत्यक्ष र अप्रत्यक्ष संलग्न छन् ।

१० फाल्गुन २०८०, बिहीबार १५:४४ मा प्रकाशित

Discover more from Bagmati Voice

Subscribe now to keep reading and get access to the full archive.

Continue reading