काठमाडौं । किस्ट अस्पतालले शताब्दी पुरूष सत्यमोहन जोशीको स्वास्थ्य अवस्था गम्भीर भएकाले आईसीयूमा राखी उपचार भइरहेको जनाएको छ ।
उनको किस्टमा १८ दिनदेखि उपचार भइरहेको छ । अस्पतालका निर्देशक प्रा.डा. सुरज बज्राचार्यले गत आइतबार जोशीको छातीमा निमोनिया संक्रमण देखिएपछि एन्टिबायोटिक सुरू गरिएको जानकारी दिए ।
मुटुको चालसम्बन्धी समस्यासमेत देखापरेकाले उनलाई आईसीयूमा राखेर उपचार गरिएको छ ।
१०३ वर्षीय जोशीलाई असोज ७ गते अस्पतालमा भर्ना गरिएको थियो । सुरुमा उनमा डेंगीको संक्रमण देखिएको थियो ।